القنيطرة : المغرب360
متابعة : الشريف محمد رشدي الوداري
بتعليمات صارمة من والي أمن القنيطرة، مصطفى الوجدي، شنت المصالح الأمنية فالقنيطرة حملة واسعة، ونجحات فإلقاء القبض على سبعة أشخاص متورطين فالشغب اللي عرفاتو أحياء الساكنية، فالوقت اللي كاينين آخرين مازال البوليس كيقلب عليهم.
هاد العملية الأمنية جات بعد ما تنشرات فيديوهات فمواقع التواصل الاجتماعي، كيبانو فيها ثلاثة أشخاص حاملين السيوف وكيهددو عباد الله، الشي اللي خلق الرعب فوسط الساكنة. البوليس ما تسناهش بزاف، وبدات التحريات بسرعة باش يعرفو شكون هاد المتورطين ويعتاقلوهم قبل ما يديرو شي كارثة.
الموقوفين تحطو تحت تدابير الحراسة النظرية، والتحقيق باقي جاري تحت إشراف النيابة العامة المختصة باش يعرفو جميع الملابسات ويشدو باقي الشركاء اللي مازال هاربين.
هاد التدخل الأمني جا فإطار تشديد المراقبة ومحاربة الجريمة، وهادشي فرح بزاف السكان اللي كيطالبو بتعزيز الأمن فالأحياء والقضاء على هاد النوع ديال الفوضى اللي ولات مقلقة الناس.
المصالح الأمنية فالقنيطرة كاينة فالمرصاد، وحسب مصادر بوليسية، الحملة الأمنية غادي تكمل حتى يتم القضاء على جميع البؤر ديال الإجرام والشغب، وضمان الأمن والاستقرار فمدينة القنيطرة.
